நினைவுகள்

ஆற்றங்கரை அரசமரத்தடி
அணைத்திருக்கும் மணல்மேடு
அருகிருக்கும் உன்னினைவுகள்
ஆனால் நீமட்டும் இன்றில்லை...



(தமிழன்பன் கவிதை) 

மறுபரிசீலனை

மரணதண்டனைக்கு கூட
மறுபரிசீலனை இருக்கிறதே
நீமட்டும் ஏனடி
முடியாதென்கிறாய்....



(தமிழன்பன் கவிதை) 

தவிப்பு

எங்கே இசைத்தாலும்
நீயே மீட்டுவதாய்
தவிக்குதடி மனது
தர்க்கமே இல்லாமல்- என்
தாளங்களை போலவே...



(தமிழன்பன் கவிதை)

காலம்

கரைகிறது காலம்
உன் நினைவை
மட்டும்
உருகாமல்
உறையவிட்டு...



(தமிழன்பன் கவிதை)

தியானம்

மனதொடுக்கி
நிலைமறந்து
தியானிக்கிறாய் நீ
திசைமாறுதடி
என் திடம்...


(தமிழன்பன் கவிதை)

முரண்

நிழல் சூடானவெயிலாய்
தூறல் பெருமழையாய்
மென்பனி கடுங்குளிராய்
அமைதியான பேரிரைச்சலாய்
நானாக நீ என்னுள்ளே ...


(தமிழன்பன் கவிதை) 

ஈரம்

நீலம் மறந்த வானம்
நில்லாது தூவும் மழை
குடையில்லாமல் - நீ
நனைந்தபடி என் மனது..



(தமிழன்பன் கவிதை) 

உளவு

உளவறியும்
உன்பார்வையால்
என் களவறிந்து ஊர்
சொல்லும் நீ -என்
உளமறியாததேனோ..?


(தமிழன்பன் கவிதை) 

காலம்

எதிர்காலம் நிகழ்காலம் கடந்தகாலம்
என காலங்களை கடந்தகாலம் அன்பே- நீ
எக்காலத்தில் வந்தாயோ நான் அறியேன்
நீ வந்து போனது எனது கஷ்டகாலம்....


(தமிழன்பன் கவிதை) 

வழி

பெண்ணழகு இதுவலவோ என நான்
பின்னழகு பார்த்து பின்சென்று பின்
என்னழகை எண்ணி ஒருகணம் நின்று
வழிகண்டு வந்தேன் பின் வந்தவழி....


(தமிழன்பன் கவிதை) 

அவன்

அது எள்ளி நகைத்தது அவனை
அதுகண்டு நகைத்தன-அவைகளும்
தெரிந்திருக்க நியாயமில்லைதான் ஒருநாளில்
வரலாறும் அவன்வாசலில் வாலாட்டுமென்று...


(தமிழன்பன் கவிதை)

துடிப்பு

உன்நினைவில் விழுந்தமனம்
விடுபடத்தான் துடிக்கிறது
கவிழ்ந்துவிட்ட கரப்பானாய்
எழுந்துவர முடியவில்லை..



(தமிழன்பன் கவிதை) 

ஏழரை

என்னைநீ விட்டுப்போனால்
கவலையில்லை மகிழ்வேனடி
விரட்டாமல் விட்டுப்போனாய்
எனைப்பிடித்த ஏழரையென்று....



(தமிழன்பன் கவிதை) 

நினைவுகள்

காலங்கள் கடந்தாலும்
கடல்சேரா நதிகளாய்
தேங்கியபடி என்னுள்
காதலின் நினைவுகள்.


(தமிழன்பன் கவிதை) 

புன்னகை

பளிங்கினில் முத்தென
சிந்திய புன்னகையில்
கவிழ்ந்தது மனது
கரைசேர்ந்தது நான்.



(தமிழன்பன் கவிதை) 

பிறவி

உனக்கெனப் பிறப்பதற்கு
பின்னையொரு பிறவியுமில்லை
உன்னையும் துறந்துவிட
நானொன்றும் துறவியுமில்லை..


(தமிழன்பன் கவிதை) 

சாபங்கள்

நல்ல உறவுகள்
கடவுள் கொடுத்த வரமாம்
எனக்கு மட்டும் ஏன்
இத்தனை சாபங்கள்...


(தமிழன்பன் கவிதை) 

எறி(ரி)கல்

கண்ணாடி இதயத்தில்
கல்லெறிந்து போகாதே
உடைவதென்னவோ நான்தான்
உள்ளிருப்பது நீயடி...


(தமிழன்பன் கவிதை) 

நினைவுகள்

வருவதும் போவதும்
வராமலே போவதும்
நீதானடி -உன்
நினைவுகள்
எப்போதும்
என்னோடுன்தான்..

(தமிழன்பன் கவிதை) 

காரணம்

என் கவிதைகளுக்கு
காரணம் கேட்கிறார்கள்
என் கவிதையான கவிதை -நீ
என்று அறியாமல்...


(தமிழன்பன் கவிதை) 

நிலா

அன்பே இனி
மொட்டைமாடியில் தூங்காதே
போகவே மாட்டேனென
அடம் பிடிக்கின்றதடி
நிலா!



(எங்கேயோ படித்த கவிதை)

விருப்பம்

உன் விருப்பங்களை
ஒருபோதும்
தடைசெய்ததே இல்லை..
உன்னை மறந்துவிடச்சொல்லும்
இந்த நிமிடத்திலும்...


(தமிழன்பன் கவிதை) 

அகக்கண்

உன் பார்வை
அம்புகள் தைத்ததில்
குருடாகிப் போயின
என் அகக்கண்கள்..



(எங்கேயோ படித்த கவிதை)

சுவடுகள்

உன் பாதச் சுவட்டில்
என் பாதம் பதிக்கக்கவும்
விருப்பமில்லை..
உன் சுவடுகள்
அழிவதைக்கூட
பொறுக்க முடியாதடி
என்னால்...

(தமிழன்பன் கவிதை) 

பார்வை

எத்தனை முறை
பார்த்தாலும்
தோற்று போகிறேன்..
அவளின்
ஒரே பார்வையில் ..

(எங்கேயோ படித்த கவிதை)

பாலைவனசோலை

நீயில்லாத
இந்தசோலையில்
பூக்களும் பனித்துளிகளும்
சிறகிலாமலே பறந்துவிட்டன
பாலைவன சோலைஎன!


(தமிழன்பன் கவிதை) 

கொள்ளி

வாரிசுகளை நம்பாமல்
தனக்குத் தானே
கொள்ளி!
உதட்டிடுக்கில்
வெண்சுருட்டு...



 (தமிழன்பன் கவிதை)